22-03-2013

Bewust

De ôfrûne wike rûchelden de meterstânkaarten by ús troch de bus. Dat wie foar my it momint om ris te sjen wat oare gesinnen sa al ferbrûke oan gas en elektrisiteit. It skeelde in hiel soad. Wy wiene omtrint 25% suniger as oaren.

Fannemoarn begjin ik dêr oer mei de bern. Ik jou komplimintsjes dat sy altyd sa goed it ljocht útdogge en de doarren goed ticht. No is dat fansels lang net altyd sa, mar ik ha leard dat positive feedback it bêste wurket by bern.

Seit ús soan mei in grutte gniis: "Wat ek helpt is dat mem noait stofsûget..."

09-03-2013

Iepen brief oan Jochem Myjer

Bêste Jochem Myjer,

Ik haw, krekt as dy, in foarleafde foar Texel. Ik kin my yntinke dat jimme de simmerfekansje net op Texel trochbringe sille. It eilân is dan oerspield mei Jochemspotters.

Wy sille ek dit jier wer nei it Woutershok by Den Burg en ik soe it hiel noflik fine no al te witten datsto dan net op it eilân bist.
Troch myn ADD haw ik oanstriid om de folsleine trije wiken fan ús fekansje myn Jochemradar oan te setten.

Ek al bist er wol, sis dan dat it net sa is. Dat soe my in hiel soad rêst jaan.

Tankewol alfêst,

Carla

25-02-2013

Benefytkonsert foar Opkikker en Cliniclowns

Efkes reklame meitsje foar in aksje fan ús heit:

In muzikale opkikker foar de Opkikker en ClinClowns.

Op sneon 13 april organisearje wy yn doarpshûs ELIM yn Skearnegoutum in benefyt muzykjûn mei as doel stichting De Opkikker en CliniClowns finansjele stipe te jaan as help by harren moaie en tankbere frijwilligerswurk. Beide organisaasjes ha as doel húshâldings fan bern dy’t lange tiid siik binne en/as gjin hege libbensferwachting ha in ûnferjitlike dei of wike-ein te besoargjen sadat hja harren soargen foar dat skoft efkes ferjitte kinne. Yn it tiidrek fan de twa en in heal jier duorjende slimme sykte fan ús bernsbern Douwina en nei har ferstjerren op sân jierrige leeftyd yn maart 2010 ha û.o. dizze beide stichtingen harren hieltiten wer op ‘e nij ynspant om it libben foar de húshâlding fan ús soan Bauke in bytsje draachliker en oangenamer te meitsjen. Dit middels ferwen-dagen, prinsesse-dagen mei Douwina as lytse prinsesse en ek b.g. mei it ynfoljen fan spesjale winsken dêr’t wy en it gesin fan ús dochter ek yn belutsen waarden.
Nettsjinsteande dat se aardich oan ‘e wei timmerje, is it wurk fan de Opkikker net echt bekend is myn ûnderfining. Neist it niisneamde bin ik ek mei de Opkikker yn ‘e kunde kaam trochdat wy mei ús Shantykoar de Brûskoppen sûnt 2009 meiwurkje oan de Piratendei fan de Opkikker yn Aldegea S. Hjir wurde alle jierren sa’n 50 famyljes mei harren bern fermakke mei de help fan in lytse 200 frijwilligers. Hjirûnder binne ek de frijwilligers fan Cliniclowns, skippers en bemanningen fan omtrint 15 skûtsjes, in tal preammen, plysje boaten en wit ik wat der noch mear fard of oars meiwurket op sa’n dei.
Mei dizze wittenskip ha ik it inisjatyf naam in muzikale aksje op tou te setten foar finansjele stipe foar dit tankbere wurk. Mei it Tsjochfestival ferline jier yn Wommels kaam ik op dit idee, dêr wiene ek in protte bern as dielnimmer en publyk en doe realisearre ik my dat der ek bern binne dy’t soks nea meimeitsje sille as kinne. Douwina wie ek sa’n dûnsjend en sjongend famke.
Troch allerhanne omstannichheden wie it der lykwols noch net fan kaam en set troch. Doe ‘t ik it der ferline wike by tafal oer hie mei de foarsitter fan ús doarpshûs, Sietse Holtrop waard dy fuort entûsjast. Underwilens ha ik de beskikking krigen oer it folsleine doarpshûs mei trije sealen en de tasizzing dat it doarpshûs bestjoer meihelpe wol by de pr, de organisaasje en war der noch mear dien wurde moat. Ien en al entûsjasme dus en allegearre om ’e nocht, it komt my suver wat oer ’t mot.
Bliuwt foarearst oer dat der muzikanten komme moatte dy’t folslein om ‘e nocht meiwurkje wolle mei in optreden, fariearjend fan 25 oan 45 minuten, oan dit Opkikkerfestival op sneon 13 april. Tankberens en ien as twa konsumpsjes is de iennichste beleaning. PA wurdt foar soarge. Mar no de rest noch. Dêrom doch ik op dizze wize in berop op Fryske artysten, trûbadoers, duo’s, (shanty en folk)koaren en groepen om harren op te jaan foar dizze bysûndere muzikale aksje foar finansjele stipe fan stichting de Opkikker en CliniClowns.
Ynformaasje oer de beide stichtingen is te finen op www.opkikker.nl en www.cliniclowns.nl.
Opjefte graach sa gau mooglik op geart.bos@gmail.com, of tel. 0515-416753 / 0645483378.
Freonlike groetnis.
Geart Bos.

24-02-2013

Opsoute!!

Ús garaazje mei platte dak grinzet oan it skoalplein en dat noeget út om der op te klimmen as der wer ris in bal op skopt wurdt.
Sa ek fannemiddei. En dan giet it petear sa:
"Van het dak af!"
"Bal"
Van het dak af!!"
"Bal!"
"Ik zeg: van dat dak af!!"
"Ja maar de bal!!"

De mem yn kwestje fynt it blykber in grutter probleem dat ik dêrnei "En nu opsoute!!" rop dan dat har soan op gjin inkelde wize blike lit it slim te finen dat er betrape is. Hy sei like hurd werom: "sout ff lekker zelf op!"

Oer de tillefoan lit se witte dat se har bern leart op deselde wize tsjin minsken te praten as der tsjin harren praten wurd. It wie dan ek folslein terjochte dat hy dat tsjin my sei. En boppedat sei se: "Dat jij een probleem hebt met communiceren dat kan jij ook niet helpen, dat is ook niet erg, maar..."

Ik haw de rest mar net mear oanheard. Ik ha ophongen foardat se har ferhaal ôfmeitsje koe.

Blykber kin ik net kommunisearje. Wêrom belje ik dan. Se begrypt it fêst wol dat ik ophingje. Wol moai, in buorfrou dy my begrypt.

Ik begryp der allinnich sels hielendal gjin bal fan. Mar ja, dat kin ik ek net helpe no? Dat is no ien kear myn beperking...

15-02-2013

Krekt wer wat foar my

Fannemoarn de bern nei skoalle brocht en trochriden nei it wurk. Op it parkearplak oankaam kloppe in kollega tsjin it rút. Och och wat gesellich sa op'e betide moarn. En sa bedarre ik op it wurk. In oare kollega moast wat besoarge hawwe tichtby de skoalle fan de bern en fansels woe ik dat fannemiddei wol elkes dwaan. Ik wie dêr ommers dochs om de bern op te heljen. Út myn wurk wei rûn ik yn de avesearstân nei de auto ta en ik socht alfêst yn myn bûsen nei de kaai dy't er net wie. Om't ik yn plaatsjes tink seach ik in byld opkommen fan in kaai noch yn it kontakt fan de auto. By de auto oankaam waard dat byld befestige. Ik wie fannemoarn sûnder nei te tinken útstappe. Ôflaad troch myn kollega. Dat doe de ANWB mar wer belje. It is net de earste kear dat soks bard. Yntusken pake en beppe ynskeakele foar de opfang fan de bern en ik wachtsje... Oja. De boadskip kin net dien wurde. Ik belje: ja, it mocht oare wike ek wol as ik de bern nei skoalle brocht. Bêst genoch! In oere letter as pland wie ik wer ûnderweis.
Gesellich bakje dien by heit en mem en ús famke hat sels noch efkes mei in klasgenoatsje boartsje kind dy't tichtby wennet. Mei in gefoel fan it hie sa wêzen moatten gie ik tsjin healwei seizen op hûs oan. De bern koene nammentlik sa ek harren moaie rapport sjen litte oan pake en beppe. Dy hiene se krigen foar de foarjiersfekansje.

Sjoet ... Foarjiersfekansje...

No moat ik oare wike dochs noch spesjaal foar myn kollega nei stêd foar dy boadskip. Wat in .... bin ik dochs...